CLAUSTRARIUS, Apparitor, Idem qui Bedellus, ut ex assignatis officiis colligitur : quod intra claustrum serviat, sic dictus. Stat. eccl. S. Dion. Leod. ann. 1330. tom. 2. Monum. sacr. antiq. pag. 446 :

Item novi canonici solvent Claustrario quinque solidos grossorum antiquorum.

Stat. S. Capellæ Bitur. ann. 1407. ex. Bibl. reg. :

Forma juramenti, quod præstare tenentur Claustrarii dictæ Capellæ in nova eorum receptione. Ego N. Claustrarius juro, quod... altare majus in festis annualibus et aliis custodiam, processiones ordinarias et extraordinarias, necnon illos qui legendi, cantandi aut thurificandi causa ad vestiarium pro cappis et ornamentis aliis induendis aut deponendis, aut aliis sacris inde recipiendis antecedam et associabo, quodque circa finem pulsationum Horarum canonicarum in domo thesaurarii, et eo procedente ad ecclesiam præibo ipsumque antecedendo reducam : necnon alia omnia et singula, quæ Claustrarius dictæ Capellæ facit et facere tenetur in eadem, faciam et complebo juxta posse.

Infra Servitores claustri nuncupantur. Vide supra Clavicularis.