1. DEMANDA, Demandæ Exactiones, quæ sub nomine gratuitæ præstationis exigebantur ; Coactæ petitiones, in Charta Theodorici Comitis Flandr. ann. 1147. in Tabulario S. Bertini. Diploma Philippi Aug. Regis Franc. ann. 1202 :

Si nos fecerimus Demandam vel talliam in Christianis vel judæis de Senescallia Andegavensi, Turon. et Cenoman. illa Demanda et tallia levabitur per manum prædicti Senescalli, etc.

Aliud ad ann. 1204. pro Oppido Niortensi in Pictonibus :

Præterea nos et hæredes nostri habemus Demandam nostram in tota Communia Niortensi, et Guillelmus Cocus (cui Niortum erat oppigneratum) Demandam illam levabit per manum Senescalli Pictavensis ad opus nostrum.

Aliud Theobaldi C. Campaniæ ann. 1229 :

Liberi erunt ab omni tallia, tolta, et Demanda, a custodia villæ, turris et gabiolæ, et a quacunque alia exactione.

Tabularium Meldense fol. 65 :

Universis præsentes litteras inspecturis Magister A. Archidiaconus de Bria Meld. salutem. Notum facimus quod nos pro novitate nostra et pro debito cujusdam domus, quam emeramus pecuniis a Reverendo Patre P. Dei gratia Meld. Episcopo, licentiam faciendi Demandam in nostro Archidiaconatu, quam nobis liberaliter concessit, et Demandam quam faciemus, de ipsius licentia speciali faciemus. Actum ann. Domini m. cc. xxxii. mense Decembri.

Et in Charta ann. 1201. inter Instrum. Hist. ejusdem Eccl. Meld. tom. 2. pag. 87 :

Archidiaconi nullam in suis Archidiaconatibus Demandam facient, nisi Episcopo assensum præbente.

Vetus Charta in Monastico Anglic. tom. 1. pag. 205 :

Tenendam libere, et quiete ab omni sæculari servitio et Demanda.

Vide tom. 3. pag. 186. Will. Thorn. ann. 1269. Probat. Histor. Monmorenciacæ pag. 75. De Lauriere tom. 2. Ordinat. Reg. pag. 258. Martenium tom. 1. Anecd. col. 953. et infra in voce Questa.

2. DEMANDA, Vox forensis, Gall. Demande, Requeste, Petitio, Libellus supplex, postulatio. Decretum summæ Cu riæ in Archivo Casti Nannet. :

Curia nostra dictum de Rohan ab omnibus aliis Demandis, requestis, finibus et conclusionibus per Procuratorem nostrum generalem factis et captis absolvit.

Regest. Parlamenti ann. 1379. apud Baluz. Hist. Arvern. tom. 2. pag. 165 :

Dictus insuper avunculus noster causam vel actionem non haberet faciendi Demandas et conclusiones, etc.

Ibid. pag. 598. in Regesto Parlamenti ann. 1408 :

Ostensio Demandæ in scriptis non erat introducta, nisi ad instructionem seu certiorationem Defensorum, an cedere vel contendere vellent. Demanda articulata,

ibid. pag. 237. Controversia seu Demanda, in Confirmatione transactionis ann. 1463. ex Archivo Præsidis de Mazaugues. Hist. fundationis Monasterii Cælestinorum Suession. apud Marten. tom. 6. Ampliss. Collect. col. 604 :

Incepimus processum Parisius in curia Parlamenti ann. Dom. 1400. in quo petivimus ea quæ in Demanda, quam ipsi curiæ proposuimus in hujus initio processus.

Vide Contestus.