1. LILIUM, Epistyliorum, et aliorum operum ornamentum, formam lilii referens : ϰρίνον, Anonymo in Descript. S. Sophiæ. 3. Reg. cap. 7 :

Capitella autem quæ erant super capita columnarum, quasi opere Lilii fabricata erant, etc.

Gaufridus Grossus in Prologo ad Vitam S. Bernardi Tironensis :

Et candelabri calamos, scyphos, spherulasque et Liliorum repansiones.

Leo Ost. lib. 3. cap. 28. (al. 26.) :

Columnas, bases, ac Lilia, nec non et diversorum colorum marmora abundanter coemit.

Gregorius M. lib. 1. Epist. 66 :

Id est, in argento calices duos, coronas cum delphinis duas, et de aliis coronis Lilios, etc.

Vetus Charta Cornutiana edita a Suaresio :

Cantharos æreos majores 6. minores 12. et Lilia ærea 2. et stantaria ærea 13.

Ardo Monach. in Vita S. Benedicti Abbat. Anianæ n. 23 :

Septem scilicet candelabra fabrili arte mirabiliter producta, de quorum stipite procedunt hastilia, sphærulæque, ac Lilia, calami ac scyphi, etc.

Vide Anastasium in Vitis PP. pag. 34. 143. 189. et quæ notavimus in Descript. Ædis Sophaniæ num. 59. necnon Annales Mediolan. ad ann. 1389. tom. 16. Muratorii col. 807. ubi memorantur Collana auri cum botonis xxxii. merenatis et Liliis v. albis cum certis perlis, etc.

2. LILIUM, Munitionis species ; cujus nomenclaturæ rationem prodit Cæsar de Bello Gall. lib. 7. cap. 67 :

Hujus generis octoni ordines ducti, ternos inter se pedes distabant : id, ex similitudine floris, Lilium appellabant.

LILIUM-Corona, Rex ipse. Instr. ann. 1384. inter Probat. tom. 3. Hist. Nem. pag. 76. col. 2 :

Item ponunt quod, exigente nobili et præcipua justicia Lilium-coronæ, ut decuit, prospicere volendo indempnitati sui ipsius et subditorum ipsius civitatis regiæ peculiaris Nemausi, distulit repentinam exequtionem et incivilem præoptatam per dictos nobiles, in hoc exheredare volendo Lilium-coronam, si processum fuisset repentine.