1. ORDINIUM, Posteritas, idem quod Ordinatus 5. Charta ann. 1192. in MS. Codice B. Mariæ Convenarum :

Sciendum est tam præsentibus quam futuris, quod ego Ramundus Arnaldus Davert per me et per omne Ordinium meum, et ego W. Arnaldus de Cavejan et fratres mei, scilicet Bernardus et Roggerius et Ato, per nos et per omne Ordinium nostrum, et ego Sulmus de Cavejan per me et per omne Ordinium meum, et ego Baro et ego Petrus Sirat per nos et per omne Ordinium nostrum, solvimus et garpimus et francum damus hospitale, quod dicitur de Toran, Deo, S. Mariæ, quæ est sedes Convenarum.

Hic per, ut alibi non semel, idem est quod pro. Charta Hugonis Comitis Ruthenæ ann. 1270. apud Baluzium tom. 2. Hist. Arvern. pag. 548 :

Concessit idem dominus Comes Ruthenæ, quod si contingeret dictum Henricum primo decedere antequam dicta Mascarosa et ejus Ordinium teneant et possideant prædictum castrum... quousque ei sit de dicta dote et lucro plenarie satisfactum.... et dictos fructus, quos interim perciperet, et proventus qualescumque essent, dedit dictus dominus Comes Ruthenæ pro se et successoribus suis eidem Mascarosæ et suo Ordinio, tanquam bene meritæ, donatione inter vivos irrevocabili.

Charta ann. 1204. apud la Faille in Probat. Annal. Tolos. tom. 1. pag. 55 :

Solverunt et reliquerunt ac dimiserunt Viziano, Leomanie Vicecomiti, et Odoni suo filio, et omnibus militibus et hominibus et feminis Altivilaris et Leomanie et eorum Ordinio, totum quod eis petebant.

Similia mox recurrunt ibidem. Licentia marcandi Bernardo mercatori Baion. ab Edwardo I. Angl. Rege concessa ann. 1295. apud Rymer. tom. 2. pag. 692 :

Dedimus ipsi Bernardo....... suisque hæredibus, successoribus et Ordinio, licentiam quod.... possit marcare retinere... quousque Bernardus et hæredes sui, vel successores aut ejus Ordinium, de bonis suis prædictis.... fuerit integre restitutus..... quare mandamus, quatenus aliquis vestrum dictum Bernardum, hæredes, vel successores suos aut Ordinium impedire non audeat.

Concordia inter Comitem Fuxensem et Matrem suam ann. 1313. apud eumdem Rymer. tom. 3. pag. 421. col. 2 :

Memoratus tamen Comes promisit dare sufficientes cautiones... qui se obligabunt principaliter de solvendis sexcentis libris Turonensium annuatim, quamdiu dicta domina vixerit, sine diminutione dotis : et post ejus vitam, donec mille marchæ dotales fuerint ejus Ordinio, modo prædicto, integre persolutæ.

Conventiones Edwardi III. Regis Angl. cum Gastone de Insula ann. 1339. apud eumdem Rymer. tom. 5. pag. 132. col. 2 :

Concessit etiam dictus dominus Senescallus, nomine dicti domini nostri Regis et Ducis, dicto Falquero, nomine dicti Gastoni et hæredibus ejusdem Gastoni, et ejus successoribus universis ac Ordinio, totum jus, quod idem dominus noster Rex et Dux habet, et habere debet, in bastidis, locis et parochiis de Viana, etc.

2. ORDINIUM, Testamentum, quo quis de rebus suis ordinat et disponit. Testam. Petronæ comit. Bigor. ann. 1251. ex Tabul. Auxit. :

Si forte de prædictis non possit Ordinium perfici, quod successum est satisfaciat de redditibus terræ Bigorræ ad arbitrium spondaliorum, quo usque dictæ comitissæ Ordinium et debila sint integre persoluta.

Vide supra Ordinare 1.