1. PARTITIO, Partionarii officium, Vide supra Partionarius 1. Stat. eccl. Tull. Mss. ann. 1497. fol. 47. v° :

Et ultra quicumque, stagio ipso peracto, percipere voluerit, tenetur officio distributionis horarum, quod Partitio vocatur, in sex florenis parvis monetæ prædictæ.

2. PARTITIO, Idem quod Præpositura, quod ex judicibus ecclesiasticis et laicis composita, sic appellari videtur. Charta Capit. S. Gauger. Camer. ann. 1233. ex Tabul. ejusd. :

Dicimus etiam quod omnes clamores, tam liberorum hominum quam cæterorum, debent fieri ad ecclesiam vel præpositos Partitionum, non ad præpositum vel eum qui loco ejus est.... De forefactis vero hominum ecclesiæ majorum, sive liberorum, sive quorumcumque aliorum, quæ per scabinos vel pares nondum fuerint judicata, potest ecclesia sive Partitio.... taxare et moderari pro suæ voluntatis arbitrio.... si præpositus credat ministrum Partitionis plus percepisse de sua portione, quam ei reddiderit, etc.

Non male tamen fortean intelligeretur Jurisdictio, quæ de mulctis judicaret ; Partitio dicta, quod mulctas ex æquo partiretur.