1. POSTERIUS, Puer pistorius seu tyrunculus pistor, sed maxime is cujus erat panes ad furnum coquendos deferre, apud rusticos Provinciales interdum Poustié. Vox ejusdem originis ac supra Postagia. Statuta Massil. lib. 1. cap. 41 :

Consules teneantur facere jurare infra viii. dies post Consiliarios electos generalis consilii, furnarios et furnairones, et Posterios furnorum quod omnem panem coquent, vel coqui facient bene et bona fide.

Occurrit etiam in Statutis MSS. Arelat. art. 154. Vide Porterius suo loco et in Portarius.

2. POSTERIUS, Qui loco publico, in quem conveniunt mercatores et in quo eorum pecunia deponitur, vel etiam exigendis tributis præpositus est. Pactum inter reg. Tunetan. et Pisan. ann. 1398. tom. 1. Cod. Ital. diplom. col. 1119 :

Nullus in ipsos fundacos intrare valeat, sine expressa licentia consulis Pisanorum, et quorum Posterii sint tales, qui possint et valeant prohibere quibuslibet Saracenis et quibuscumque aliis personis, ne ingrediantur in fundacos sine voluntate consulis.

Charta ann. 1441. ibid. tom. 3. col. 526 :

Quod buletinum seu scriptum præsentes datiariis seu Posteriis datiariorum ad fidem faciendam, etc.

Infra :

Per datiarios seu alios officiales, etc.