RESEDIUM, Residium, Ital. Risedio, Sedes, habitatio, mansio, ubi quis residet. Charta ann. 1239. apud Lamium in Delic. erudit. inter not. ad Hist. Sicul. part. 2. pag. 339 :

Renuntiaverunt domino Joanni abbati dicti monasterii recipienti pro ipso monasterio et pro se et suis legitimis successoribus prædictum Pierum Cavalorum (cum) omni sua familia, filiis et filiabus, et cum ejus Resedio et toto suo tenere et podere, et terris et bonis et rebus suis omnibus et singulis... Cum omni jure et actione.... adversus dictum Pierum et ejus familiam, et filios et filias, et ejus Residium et tenimentum et alia sua bona pertinentibus et competentibus, quatenus deinceps possit dictus abbas et ejus successores pro dicto monasterio dictum Pierum, cum ejus familia et Resedio et podere et tenimento.... habere, tenere, vendere, alienare, etc.

1. RESIDIUM, Quod pro jure residentiæ domino solvitur a residentibus. Additamenta ad Leges Ludovici II. art. 32. apud Murator. tom. 1. part. 2. pag. 162. col. 1 :

Ut liberi homines nullum obsequium Comitibus faciant, nec Vicariis, neque in pasto, neque in aratura, neque in vinea, et conjectum vel Residium non solvant, exceptis aribannatoribus vel missaticis, qui legationem ducunt.

Baluzius tom. 1. Capitul. col. 400. præfert :

Neque in prato, neque in messe, neque in aratura aut vinea, et conjectum ullum vel Residuum eis resolvant, excepto servitio quod ad Regem pertinet, et ad heribannatores, vel his qui legationem ducunt.

Malim Residium quam Residuum. Vide supra Residentia.

2. RESIDIUM, Sedes, habitatio. Vide supra Resedium.