« »
 
SAGENA 1, SAGENA 2.
[]« 1 sagena » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 265b. http://ducange.enc.sorbonne.fr/SAGENA1
1. SAGENA, Rete, vox Latinis nota. Papias : Sagena, retia, verundum Græce, vulgo everclum dicitur. Gloss. Lat. Gall. Sangerm. : Sagena, Retz. Inde Sagenarius, ria, rium. Nostris Seine, vel Senne. Testam. Eddonis Argent. Episc. regnante Pippino apud Eccardum in Orig. Habsburgo-Austr. col. 144 :
Piscationes agere cum nostris piscatoribus, capturam [] etiam piscium cum Sagena, in omnibus medietatem.
Charta Matthæi Comitis Bononiensis ann. 1173. in Tabul. S. Judoci :
Ita quod nullus præter eos vel eorum successores in costa maris ab Alteia usque ad Cantiam Sagenam posset deducere, etc. Tractus Sagenæ.
Charta Gaufredi Comitis Andegavor. apud Sammarthanos in Abbatib. SS. Sergii et Bacchi :
Confero in perpetuum Monasterio..... tractum Sagenæ in flumine Meduana juxta ipsum Monasterium, qui tractus Tertii nomen habet.
Vide Chartam aliam Philippi Regis Franc. ann. 1283. apud eosdem in Archiep. Rotomag. ubi tractus sagenæ est facultas piscandi, et rete in piscariam jaciendi et immittendi. Privileg. oppidi Parchim ann. 1218. in Rudloff. Cod. Diplom. Megalop. num. 1. pag. 1 :
Item piscacio per omnem provinciam communis et libera est, cum sportis et hamis et retibus, exceptis solis Sagenis.
Metropolis Salisburgensis tom. 2. pag. 533 :
Item tres Sagenas, unam in Schebach, alteram in Matse, tertiam Pat. quæ protenditur a pede montis, in quo sita est civitas Walkerstegen.
Charta Henrici Imper. ann. 1111. ibid. pag. 549.
Dedit et 3. Sagenas, unam Sebach, etc.
Ubi sagena nude videtur sumi pro Piscaria. Adde Acta SS. tom. 3. Julii pag. 759.
P. Carpentier, 1766.
◊ Sainsine, eadem, ut videtur, notione, in Lit. remiss. ann. 1404. ex Reg. 159. Chartoph. reg. ch. 223 :
Un autre filé viez, appellé Sainsine, à pescher.
© École des chartes.
[]« 2 sagena » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 265c. http://ducange.enc.sorbonne.fr/SAGENA2
2. SAGENA, Navigii species. Diploma Chilperici Regis Franc. pro Ecclesia Tornac. apud Miræum in Cod. donat. piar. pag. 16 :
Teloneum de navibus super fluvio Scalt.... vel quolibet commercio seu et de cariagio, vel de Sagenis, nec non et de ponte super fluvio Scalt, etc.
Idem Diploma rursum editum apud eumd. tom. 2. pag. 1310. ubi legitur, et de carrigio vel de Saginis. Epistola Ludovici II. Imp. ad Basilium Imp. in Chron. Salernit. cap. 107. extrem. :
Et quia nonnulli Saracenorum Panormi latrunculi cum Sagenis... per Tyrrhenum mare debacchantur, etc.
Charta Caroli C. ann. 859. in Tabulario Abb. Belliloci in Lemovicibus n. 4 :
Ut nullus exactor vel judex publicus nec de navibus, nec de Saginatibus, vel carris, seu quibuslibet exactionibus undecumque fiscus aliquid exire potest, quicquam ab eis accipiat.
Charta Nicolai II. PP. in Chronico Reichersperg. ann. 1059 :
Quot adversa pertulerit... adeo ut columna Dei viventis jam jam pene videretur nutare, et Sagena summi piscatoris procellis intumescentibus cogeretur in naufragii profunda submergi.
Ita Sagena piscatoris, apud Hugon. Flaviniac. pag. 192. quæ Sagena B. Petri, Petro Damiano apud Baronium ann. 1062. n. 57. Laurentius Veron. lib. 1. de Bello Balearico :
Barcæ, currabii, lintres, grandesque Saginæ.
Nisi quis Sagittæ legat. Occurrit præterea in Vita S. Athanasii Neapolit. Episc. apud Murator. tom. 2. part. 2. col. 1062. in Vita S. Romuli Episc. Januensis in lib. Miraculor. S. Fidis cap. 13. et alibi, ut σαγήνη crebro etiam eadem notione apud Græcos Scriptores medii ævi. Constant. de Adm. Imper. cap. 31. pag. 99. lib. 2. de Themat. cap. 1. 6. pag. 79. 80. 94. 119. apud Mauricium lib. 1. Strategic. cap. 21. Gregoram pag. 72. etc. Vide Glossar. med. Græcit. in Σαγίνη, col. 1316.
Sagenula, Eadem notione. Papias : Sagenula, pro navi ponitur. Vita S. Adhelmi [] tom. 6. Maii pag. 88 :
Tunc Dei famulus... Sagenulam ascendit et eos continuo non dedignatus adivit. Statim autem ut Sanctus ille naviculam suo corpore ponderavit, etc.
© École des chartes.