1. ASSIDUITAS, Residentia, quæ debetur a Canonicis, seu aliis Beneficiatis, in suis Ecclesiis. Tabularium S. Aniani Aurelian. :

Ego Philippus D. G. S. Aniani Decanus, et universum ejusdem Ecclesiæ Capitulum, ex consilio Dom. Regis Ludovici fratris nostri et beneplacito firmiter statuimus, ut tantum Canonici in claustro manentes, aut si extra claustrum manserint, huic Ecclesiæ Assiduitatem reddentes, integros suarum præbendarum redidus habeant. Assiduitatem vero vocamus, et juxta consilium Do. Alexandri III. PP. determinavimus, ut ille tantum dicatur Assiduus, qui huic Ecclesiæ soli Canonicum servitium exhibebit. Qui autem extra claustrum manserint, aut huic Ecclesiæ Assiduitatem servitii non reddiderint, singulis annis tantum 20. solidos habeant, etc.

Charta Odonis Episc. Parisiensis ann. 1204 :

Si vero major Matricularius laïcus circa servitium Ecclesiæ Assiduitatem non fecerit, etc.

Vide Residentia.

2. ASSIDUITAS, Assiduus et quotidianus usus. Necrol. eccl. Paris. MS :

x. Kl. Jan. obiit magister Symon de Pissiaco, qui... donavit... altari B. M. bacinos quinque marcharum et dimidiæ, de quibus excommunicatum est ne de altaris Assiduitate removeantur, ni peste famis impellente.

Vide Assidualis.