4. ABSIDA, Feretrum in quo reliquiæ Sanctorum continentur, sic forte appellatum, quod in absidem seu cameram desuper convolvatur. Gesta Consulum Andegavensium cap. 3. n. 26. ubi de Relatione corporis S. Martini :

Absida siquidem quam deferebant, erat fusilis ex auro et argento, quod dicitur electrum, spissitudine duorum digitorum, actoremque operis B. Perpetuum insculptor designarat, suffragio litterarum, etc.

Vide S. Paulini epistolam. 32. edit. 1685. pag. 206. et not. 149. pag. 64. ubi præter cetera docetur Absidam ut plurimum sumi pro concha altaris, vel ipsa sacra mensa seu altari ; v. g. cum dicuntur in Absidis repositæ Sanctorum reliquiæ quas sub altaribus, et intra altaria recondi solitas notum est. Videsis et D. Cangii lib. 3. Constantinop. Christ. p. 45. et 46. ** Vide Salmasium ad Solinum cap. 55. p. 852.