1. ACCESSIO, In Gloss. Gr. Lat. ἐπισημασία ἐν πυρετῷ, accessio febris. Apud Celsum vox frequens, cui opponitur Decessio. Epist. scripta sub nomine I. C. sub Carolo M :

Mittam in eis pustellas, Accessiones, et langores, et omne genus infirmitates.

Apul. de Virtut. herbarum pag. 190 :

Ad quartanas herbæ plantaginis succum in aqua multa ante duas horas Accessionis potui dato.

Hinc nostris, accès de fièvre.

2. ACCESSIO, Acquisitio. Charta Ludovici Pii Imperat. in Chronico Farfensi pag. 654 :

Et undecumque ad eos tam per venditiones, Accessiones, commutationes possessionesque eidem Monasterio... venit.

Cic. de Off. lib. 1. cap. 39 :

Accessionem adjungere ædibus.

3. ACCESSIO, Canalis, rivus, quia ad opus molendini necessario accedit. Præcept. Ludov. Pii ann. 823. apud Ughel. tom. 2. Ital. Sacr. col. 96. edit. 1717 :

Similiter donationem, quam fecit... dom. et genitor noster Carolus Imperator petenti Geminiano Mutinæ episcopo de molendino prope stratam, cum Accessione sive aquario.

Ubi perperam editum Acceptione apud Murator. tom. 1. Antiq. Ital. med. ævi col. 772. Charta ann. 998. apud eumd. Ughell. ibid. col. 108 :

Cum decem jugeribus de terra, inter paludes et sylvas, quinque supra ipsum molendinum, et quinque subtus, cum Accessione et aquario suo.

Rursum occurrit ibidem col. 110.

4. ACCESSIO, Terrarum accretio, idem quod Accessa 2. Charta Friderici I. Imp. ann. 1177. apud Murator. tom. 5. Antiq. Ital. med. ævi col. 1048 :

Piscationibus, venationibus, salinis, et his, quæ Accessione et alluvionis jure capiuntur.

Nisi tamen idem sit quod Accessio 2. Acquisitio. Accessio et Alluvio sunt voces notissimæ fori Romani.