ACEOLUM. Vita S. Udalrici Episc. in Actis SS. Ord. S. Benedicti sæculi 5. pag. 427 :

Missarum autem celebrationibus expletis et vesperis decantatis, ad hospitiolum pauperum pervenit, et xjj pauperum pedes lavit, et unicuique eorum de Aceolo pretium unius denarii donavit.

Ibid. pag. 429 :

Allatis vestibus novis, duodecim pauperes vestivit et acervulum Aceoli aliis dispensavit.

Dictum conjicit Mabillon. ibidem pro sacculo aut marsupio. Verum repugnat exemplum ultimum. Mendose scriptum fuisse crederem pro Linteolo, seu linceolo tela linea, unde nostrum Linceuil. Hinc facile intelligitur Udalricum 12 pauperes vestibus novis induisse, cæteris Linceoli seu telæ acervulum per partes distribuisse. Adde quod antiquus mos sit in Monasteriis et Ecclesiis plurimis, distribuendæ telæ pauperibus post Lotionem pedum.