ACROISIA, Vita et Miracula S. Gilberti de Sempringham tom. 2. Monastici Angl. pag. 694 :

Inter medios hostes, qui ei insidias tetenderant, quasi Acroisia percussos, ad instar Elizei transierunt.

Legendum aorasia ex Græc. ἀορασία, cæcitas. Balbus in Catholic. ait :

Aorasia debet dici. Quidam tamen dicunt Aorisia, quidam aurisia, etc.

Ita perperam scriptum in Epist. 29. Petri Blesensis :

Duo discipuli euntes in Emmaus, Acrisia sublata, in fractione panis dominum cognoverunt.

Sic et in Histor. Scholast. Petri Comestoris cap. 52 :

Acrisia quam latine Avidentiam dicere possumus.

Perperam scriptum audentiam. Sunt tamen qui Acrisiam a voce ϰρίσις et a privat. factam putent, ita ut sit judicium erroneum, inquit Macer in Hierolexico. Martinius.