ADTRAHERE, Glossarium mediae et infimae latinitatis, Du Cange et al.

« Adtrahere » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 095a. http://ducange.enc.sorbonne.fr/ADTRAHERE

ADTRAHERE, Acquirere. Formulæ veteres cap. 27 :

Tam quod regio munere perceperat, et quam de diversis partibus per venditiones, donationes, cessiones, commutationes Adtraxerat.

Charta Caroli M. in Chronico Laurisham. ann. 776 :

Quidquid adhuc ex munere Regum, seu Reginarum, seu quod pro collata populi, vel de comparato, vel de quolibet Adtractu augmentare, vel immeliorare seu Adtrahere potuerint.

Alia ejusdem Caroli M.

anno 1. regni ex Tabulario Corbeiensi :

Ut quidquid.... ab ipsis Abbatibus inibi servientibus fuit Attractum, aut inantea ibidem, Deo auxiliante, a quibuslibet hominibus fuerit melioratum vel augmentatum, etc.

Vita S. Desiderii Episcopi Cadurcensis cap. 18 :

Multa terrarum compendia, multa villarum prædia adquivisit, non quidem ulli tollendo, sed benefaciendo, eodemque Adtrahente, multaque beneficia affluenter attribuente.

Primum Testamentum Widradi Abb. Flaviniac. :

Et si aliquid comparavero, vel Adtraxero, etc.

Adtractus, vel Adtractum, Comparatum, acquisitum. Charta Chlodovei III. Regis ann. 2 :

Quidquid ipse Ingoberchtus vel memorata Angatrudis, tam de alote parentum, quam de comparato, vel de qualibet Adtractum ibidem tenuerint, vel possederint, etc.

Charta inter Alamannicas Goldasti 39 :

Quidquid genitor meus... de quolibet Adtracto in loca illa habuit.

Et cap. 50 :

Quantumcumque mihi in jam dicto pago advenit tam de paternico, quam de maternico, seu de comparato, vel qualicumque Adtractu noscitur ad me pervenisse.

Occurrit passim apud Marculfum lib. 2. form. 6. 7. 11. 23. etc. in Form. antiq. apud Doubletum pag. 718. 724. Ughellum tom. 5. pag. 602. etc.

Contractum, Eadem notione in formula 62. ex Lindenbrogianis. Sunt qui comparatum volunt esse id, quod dato pretio, conlatum, quod gratuito quæritur. Adtractum denique, quod velut merces industriæ et lucrum laboris obvenit. Sunt et alii qui Adtractum esse putant, quidquid ad feudum dominii jure, sive ex defectu hæredis, sive ex delectu vassalli, devenit seu Attrahitur. Comparatum vero quidquid per emtionem aut donationem acquiritur.