ALBENDA, Idem forte quod Benda, cui adjectus est Arabicus articulus Al. Est autem Benda, Hispanis Fascia, nostris Bande. Quid si Albenda idem sit quod Balteus, Gallice Baudrier, qui latior fascia est, ex qua dependet ensis ? Liber Regulæ Monasterii Legerensis apud J. Moretum in Antiquit. Navarræ pag. 276 :

Regnavit pro eo (Fortunio Garsea) frater ejus Sancius Garseanes, cum uxore sua Domina Tota Regina. Et venerunt ambo ad dictum Monasterium, ut a prædicto Fortunio acciperent gratiam et benedictionem. Quos cum benedixisset, dedit Sancio fratri suo quatuor Albendas, et unam cortinam, et tria cornua, et spatam cum vagina, loricam cum collare de auro, diadema de capite suo, scutum et lanceam cum camo, freno et sella duas tendas, et duas ciclabes.

Vide Alben. Albenda est vox Persica, Arabibus insitata בנד, Vexillum magnum, cum art. לא.