ALGATZARIUS, Algatzerius, Officialis præfecti, vel illius judiciorum executor, idem qui Alguazilus. Vide in hac voce. Constitut. MSS. Petri III. reg. Aragon. ann. 1359 :

Statuimus quod Algatzarius noster, vel nostri generalis gubernatoris,.... nequeat recipere, ratione carcelagii vel morabatini, ab aliqua persona, quæ in posse suo per decem dies, vel plures capta exstiterit, nisi decem solidos Barchinonenses dumtaxat.... Et si forsan contigerit quod aliquis baro, miles, vel homo de paratico, civis, burgensis, vel homo villæ honoratus ad pœnam mortis naturalis, per nos vel nostrum generalem gubernatorem fuerit condempnatus, quod eo casu dictus Algatzarius,... pro jure sui officii, nequeat de bonis ipsius condempnati quicquam recipere vel habere, nisi... arma propria sui corporis, ensem videlicet, corrigiam, bratxiam vel cultellum, qui de argento essent muniti, et quos secum teneret tempore suæ captionis, et lectum etiam et vaxellam argenti propriam, quæ sibi in captione servisset.

Alia ejusd. ann. :

Bajulus Cathalaniæ,.... sub pœna mille aureorum, teneatur tacsationem facere de quibuscumque scripturis officii vices gerentis gubernatoris in Cathalonia, et etiam Algatzerii curiæ ejusdem.