2. ALTANUS, Auster, Gall. Autan. Papias : Ethesia, aura ab aquilone flans, Altanus dicitur. Aura flans ab aquilone non Auster, ut hic ait Cangius ex Papia, sed Boreas appellatur. Verum Papias MS. Bituric. : Altanus, Flatus qui in alto est, id est in pelago. Isidorus in Gloss. San-German. : Altanus, Flatus qui in pelago est, per dirivationem ab alto, id est mari, vocatus ; nam alter est flatus in ripis, quem dicimus auram. Nam aura terræ est. Huic sententiæ minime favet Plinius lib. 2. cap. 43 :

Ventos et e fluminibus ac nivibus et e mari videmus, et quidem tranquillo, et alios quos vocant Altanos e terra consurgere : qui quidem, quum e mare redeunt Tropæi vocantur ; si pergunt, Apogæi.

Altanus autem proprie Eurus est seu Subsolanus, ut liquet ex Charta MS. relata inter Antiquitates Occitaniæ Benedictinas a Stephanotio collectas part. 1. pag. 368. in qua sic legere est :

Ipsa terra... affrontat de Aquilone in terra S. Aniani... De Altano affrontat in terra de Odone Stephano : De Meridie in terra de Bernono Landrico... de parte Circi (id est Septentrionis) similiter.

Hinc etiamnum Occitani Euronotum vocant Autan : De quo ait du Bartas in sua secunda Septimana de Paradiso terrestri loquens :

Là le robuste Adam ne sentoit point son corps

Aggravé des Autans, ni roidi par les Nords.