ALTARAGIUM, Glossarium mediae et infimae latinitatis, Du Cange et al.

« Altaragium » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 202b. http://ducange.enc.sorbonne.fr/ALTARAGIUM

ALTARAGIUM, Alteragium, Altelagium, Obventio altaris. Charta Oliveri Episcopi Lincolniensis tom. 2. Monastici Anglic. pag. 881 :

Vicaria in Ecclesia S. Martini de Stamforde... consistit in toto Altaragio dictæ Ecclesiæ.

Alia Ricardi Dunelmensis Epis. pag. 152. ibid. :

Et medietatem decimæ bladi cum toto Alteragio ejusdem.

Monasticum Anglic. tom. 3. pag. 139 :

Similiter Vicarius de Colingham habeat totum Alteragium, exceptis decimis fœni et nutrimentorum animalium provenientium de Dominico domini Regis.

Occurrit ibi pluries, et pag. 227. et part. 2. pag. 45. Will. Thorn. cap. 30. § 4 :

Ita quod prædictus Vicarius... prædictis oblationibus et obventionibus, non bladis aut garbis, nisi plantatis, aut pede fossis, ad Altaragia communiter spectantibus, contenti, etc. Obventiones Alteragiorum

in Vitis Abbatum S. Albani. Regestum Clementis V. PP. in Bibl. Regia :

Cum itaque Alteragium de Ostade Cameracensis diœcesis, quod... in dicta Ecclesia obtinuit, per liberam resignationem... in manibus nostris factam, et a nobis admissam, vacet ad præsens, nullusque de illo præter nos disponere possit, etc.

P. Carpentier, 1766.

◊ Charta G. episc. Ebroic. ex Cod. reg. 5456 :

Ad præsentationem A. Ebroicensis abbatissæ et conventus recepimus ad vicariam de Cauge, scilicet ad Altaragium, cum minutis decimis et obventionibus.

Hinc, et ex aliis, quæ ad hanc vocem supra laudantur, Altaragium id potissimum dictum fuisse videtur, quod vicario altare deservienti assignabatur, quodcumque illud fuerit ; cum præcipui reditus iis, quos curiones primarios vocamus, reservarentur. Unde et Altararius nuncupatur. Vide in hac voce.

Altelagium. Necrolog. Eccl. Ambian. :

Ob. Theobaldi Episc. qui dedit nobis Altelagia de Chessoy, etc. quorum Altelagiorum omnes proventus in anniversario suo debent in Ecclesia nostra tali modo distribui.

P. Carpentier, 1766.

◊ Acta MSS. capitul. S. Petri Insul. ann. 1437 :

Die Lunæ ix. Septembris, ad relationem dom. decani pro dom. Petro Melantois nuper misso apud Wervic super Altelagiis ecclesiæ, fuit conclusum, ut matricularii seu Kerkemans dictæ ecclesiæ de Wervic, habeant et levent Altelagia in eadem ecclesia dominis de capitulo spectantia pro anno 1436. præterito et 37. currente, pro 36. libris quolibet annorum eisdem dominis solvendis.