ALTERARE, Mutare. Will. Neubrigensis lib. 2. de Gest. Pontific. Angl. pag. 245 :

Adolescens Alteravit habitum apud Diberst, tunc exiguum Cœnobium.

Vita S. Neoli Abbat. n. 6 :

Nonnunquam vero peregrinorum Alteratus induviis in Ecclesia pernoctabat.

Auxilius de Formoso Pap. apud Mabillonium :

Si itaque astipularis, quemlibet jure sacramento non posse uti, alterum jure sacrare, fatearis indubitanter, sacramentum Alteratum existere. Unde requiro abs te, utrum jure in sacramento Alteratum sit dicere. Alteratum sacramentum, inquam, appello, quicquid divinitus per ministrorum celebratur manus, ut puta baptismum, impositio manuum et cætera cœlestia.

Occurrit ibi pluries. Diploma Ottonis Comitis Palatini Rheni ann. 1231. apud Tolnerum in Probat. Hist. Palatinæ pag. 148 :

Præterea volumus, ut tempore nostræ refectionis propter præsentiam aliquorum Prælatorum, cujuscumque professionis fuerint, locum quem assignamus in latere nostro, non Alterando transmutet.