1. AMPHORA, Dicta quod hinc et inde levetur. Recipit enim liquoris pedem quadratum, frumenti modios Italicos tres. Sic Papias MS. Bituric. In Glossar. nostro San-German. ex Isidoro legitur : Amphora... recipit autem vini vel aquæ pedem quadratum, frumenti vero modios Italicos tres. Budæus lib. 5. de asse ait :

Ego Amphoram unam ternos modios capere dico, et duodequinquaginta sextarios.

Et aliquanto post :

Tranquillus vini Amphoram, id est, octo congios duodequinquaginta sextarios, uno convivio ab homine uno haustos dixit.

Hæc ad amplitudinem amphoræ designandam dicta sint. Nomen enim ipsum quod spectat, a Latinis usurpatum fuisse nemo nescit : Græcum tamen esse volunt ex ἀμφὶ et φέρω derivatum, quod duabus ansis ornatum utrinque ferri posset. Vide Ambra 2.