APPAR, et Apar, Papias : Suppar, compar, Appar, composita. Appares porro vel Apares vocant inferioris sæculi Scriptores Epistolas generales, quæ uno exemplo, paucis mutatis, ad diversos mittuntur. Anastasius in S. Hadriano PP. pag. 108 :

Apparem istius donationis per eundem Ætherium adscribi faciens.

Ubi pro exemplo. seu uti dicimus copia, vox sumitur. Apparum eadem notione occurrit in Chron. Farfensi apud Murat. tom. 2. part. 2. col. 498 :

Et fecit ei de prædicta cella destructa libellum in tribus personis Monachorum, succedentibus uno duobus, sicut consuetudo secularium Monachorum tunc erat. Unde et Apparum ipse Abbas retinuit apud se, quo ingressus incolumem locum restituit.

Et col. 499 :

Qua de causa egressus Johannes Abbas de hoc Monasterio abiit ad Azonem Abbatem de Aventino suum germanum, portans secum quædam præcepta, et aliquantas chartas hujus Monasterii, inter quas erat præceptum de cella Minionis et Apparum jam dicti libelli.

Post Novellam Theodosii et Valentiniani de Amota militantibus fori præscript. ad Ariovindum Magistrum Militum :

Eodem exemplo Aspari viro illustri Comiti Exmagistro Militum et Exconsuli bis ordinario.

Atque hæc quidem Epistolæ Consimiles in Testamento Sancii I. Regis Portugaliæ æræ 1217, Uniformes dicuntur apud S. Hilarium in fragmentis pag. 45 :

Liberius, antequam ad exilium iret, hanc Uniformem Epistolam Confessoribus scripsit, etc.

Et apud Nicolaum PP. I. Epist. 8. in fine :

Nec non et Epistolam Uniformem. quam quibusdam claris Urbis Constantinopolitanæ Senatoribus singillatim scribendam atque mittendam fore prævidimus.

Epistolæ autem istius, quæ est 16. titulus sic concipitur :

Nicolaus... singulis quibusdam Senatoribus Constantinopoleos, Aparibus.

Ubi vox Aparibus, non ad vocem Senatoribus refertur, sed per receptam hac ætate formulam additur, ut innuatur uno exemplo dictatas et missas Epistolas ad diversos ; quæ pluries occurrit apud Gregorium Magn. interdum per apparibus, interdum per Aparibus cum unico P. descripta, lib. 1. Epist. 24. 25. lib. 2. Indict. 11. Epist. 49. lib. 5. Epist. 29. 52. 54. lib. 7. Indict. 1. Epist. 15. Ind. 2. Epist. 27. 39. 112. lib. 9. Epist. 52. lib. 10. Epist. 7. et apud Joannem VIII. PP. Epist. 99. 191. 227. Sed et apud Gregorium VII. PP. lib. 1. Epist. 4. quæ ad diversos inscribitur, hæc habentur :

Incœptis quidem Aparibus, sed circa finem singulis Epistolis juxta locorum et personarum competentiam discrepantibus. Data Romæ, etc.

Adde lib. 2. Epist. 16. Hugonis Abb. Farfensis relatio de Monasterio suo, apud Mabillon. tom. 4. Annal. Benedict. pag. 700. col. 2. :

Et cum die sequenti Sabinis venissemus manibus nostris firmavimus tertium genus, et nostros direximus ad eum legatos, ut acciperet illud præfatus Comes et Appare ab illo firmatum nobis mandaret, sed facere noluit.

Ita apud Radulfum de Diceto, Epistola, quam Richardus Anglorum Rex nobilibus, quibus Regni curam commiserat, dum sacram peregrinationem obiret, scripsit, hanc præfert inscriptionem :

Richardus Rex Angl. Willelmo Cancellario, G. Filio-Petri, W. Marescalle, et H. Bard. et W. Briwer, Apparibus.

Salmasius in lib. de Jure Attico et Romano vocem distinguendam putat, a paribus, ut sit απὸ τοῦ ἴσου, απὸ τοῦ ἰσοτύπου, ἰσοτύπως, epistola scilicet eodem, quo alia exemplo scripta. Palladius in Vita Chrysostomi pag. 22 :

Ἀνταπέστειλεν ὁ μαϰάριος Ἰννοϰέντιος ὁ Πάπας άμφοτέροις τοῖς μέρεσι τὰ ἴσα τῆς ϰοινωνίας.

Agatho Diacon. de VI. Synod. Ἰσοτύπους ἐναπογράφους τόμους vocat. Sed loci supra allati videntur evincere, aparem, vel apparem similem denotare, vel potius exemplum alterius scripti, maxime locus Anastasii. At cur aparibus vulgo scriberetur in ablativo, existimaverim indicari Epistolas pari tenore vel certe aparibus, seu similibus, descriptas, singulisque (quibus alias generatim inscribuntur) licet eodem contextu inscriptas ac missas. Charta Ludovici Pii pro Monast. S. Dionysii in Tabulario ejusd. Ecclesiæ :

Duas super hoc jure pari tenore conscriptiones fecerunt, easque manibus firmaverunt propriis, ut altera earum in archivo ipsius Monasterii... servaretur : alteram vero nostræ magnitudini direxerunt, ut illam Palatinis scriniis juberemus recondi.

Cæterum nescio an in Synodico adversus tragœdiam Irenæi cap. 115. initio non legendum sit, Apparis pro Sarparis. Judicet Lector. Hæc vero formula quæ in subsequentibus summorum Pontificum epistolis frequens est, primum occurrit in epist. 3. Zosimi PP. quæ apud Constantium tom. 1. Epist. Rom. Pontif. pag. 949. legitur. Vide Paricla.