ARCHILOGOTHETA, Archicancellarius : ita indigitatur S. Heribertus Coloniensis Archiepiscopus apud Lambertum in ejus Vita n. 8. et Rupertum Tuitiensem cap. 7. qui cap. 5. dicitur

Primus Cancellarius

. Ita etiam Heribertus Archiep. Coloniensis in Charta Ottonis III Imp. apud Maximilianum Henricum in Apologia Archiepiscopi Colon. pag. 21. Notum porro Archiepiscopum Colon. Archicancellarii Italiæ dignitate adornari. Vide novam Gall. Christ. tom. 3. Nominis origo a magno Logotheta, qui in palatio Græcorum Imperatorum Archicancellarii munere fungebatur, id est, Aureas Bullas et Edicta Principum subscribebat. Primum Logotheta dromi seu cursus publici Cancellarii munus obibat, ut diserte testatur Nicetas in Manuele lib. 7. num. 1 :

Ὥστε ὁ μὲν τὸν οἰϰεῖον, ὡς ἡ Λατίνων φωνὴ, Καγϰελάριον, ὡς δ᾽ Ἑλλῆνες εἴποιεν Λογοθέτην.... πέμψας μετὰ πλείστης δυνάμεως, etc.

Verum id munus postmodum transiit ad Magnum Logothetam, de quo plura Codinus cap. 1. 4. et 5. Vide Glossarium med. Græcitatis V. Λογοθέτης.