1. ATTRACTUS, idem qui Contractus, mancus, membris captus, Italis Attratto, ritratto, storpiato, impedito dalle membre. Vita S. Nicetii Episcopi Lugdun. n° 8 :

Dæmoniacis remedium, Attractis vigorem integrum... confert.

Vide Contractus.

2. ATTRACTUS, Facultas, quam habet dominus feudi, retinendi homines alterius dominii, ita ut a propriis dominis repeti non possint. Charta Hugonis Ducis Burgund. ann. 1172. pro fundatione S. Capellæ Divionensis, apud Perardum :

Concessi... ut videlicet Clerici ei deservientes liberum habeant Attractum in villa Divionensi, eodem modo, quo habeo, id est, libertatem retinendi homines, eandem quam habeo in villa Divionensi.

Eadem habentur in Chartis Odonis Ducis ann. 1201. et 1202. pro Communia Belnensi. Occurrit præterea in alia ejusd. Odonis ann. 1196. pag. 341. et alia Milonis D. Noeriorum ann. 1239. pag. 245. 272. 275. et 444. Charta Goffredi Comitis Andegavor. de Consuetudinibus terræ S. Sergii, apud Sammarthanos :

Birbiagium etiam de toto Attractu in omnia ovilia illorum dominica per universas terras suas, excepto Attractu extraneorum hominum, de quibus ipsam consuetudinem habere dinoscor.

3. ATTRACTUS, in Jure Hungarico, Reus, cui lis intenditur, in jus tractus, Elo idez tetot.

4. ATTRACTUS, Attractum, Acquisitio, illa præsertim, ut arbitror, quæ labore fit vel industria, in quo distinguitur a Comparato, quod fit dato pretio, vel etiam gratuito. Hinc in Testamento Widradi Abbatis Flaviniac. :

Et si aliquid comparavero vel Adtraxero.

Diploma Ludovici Pii ann. 824. inter Acta SS. Aprilis tom. 2. pag. 73. f. :

Ut, quantumcumque memorata Ecclesia S. Zenonis per donationem nostram vel dicti germani nostri, et Rotaldi prædicti Episcopi vel cæterorum fidelium traditione, vel ipsorum comparatu, seu quolibet Attractu juste et legaliter habere dignoscitur.

Charta Theoderici II. Regis Franc. pro Monasterio Bertiniano apud Miræum tom. 1. Diplom. Belgic. pag. 128. col. 1 :

Quidquid eo tempore possidebant aut adhuc in antea ex munere Regum vel de collato populi seu de comparato aut de comparando, aut de quolibet Attracto.

Vide in Adtrahere.

5. ATTRACTUS, Locus in quo dominus, qui jure Attractus gaudet, retinere potest homines alterius dominii. Libert. castri S. Joan. ann. 1227. tom. 4. Ordinat. reg. Franc. pag. 387. art. 7 :

Volo autem ut illi quos in Attractu castri mei sancti Johannis retinui vel retinuero, liberi sint cum omnibus rebus suis.

Vide supra 2.

6. ATTRACTUS, idem videtur quod Espava, Jus nempe in animalia aberrantia ; vel animalium quæ in damno sunt, captio et emenda ob id exsolvenda. Charta ann. 1060. inter Probat. Hist. Sabol. pag. 353 :

De omni quoque Attractu extraneorum porcorum, quem monachi facient in boscho de Jarziaco, habebunt monachi medietatem, et dominus de Jarziaco aliam medietatem.

7. ATTRACTUS, Canalis, in quem aqua attrahitur. Reg. Philip. Aug. 34. bis in Chartoph. reg. part. 1. fol. 96. v°. col. 1 :

Si inpejoraret fossatum pro suo Attractu faciendo, ipse reficiet tam bonum, vel melius, vel quocumque modo inpejoraret.