AUCIRE, Occidere, unde vetus Gall. Occire. Charta Alboyni Anglor. Regis pro reparatione Ecclesiæ S. Petri in Comitatu Ruthenensi, ann. 1028. inter Instrum. tom. 1. Gall. Christ. pag. 49. col. 2 :

De ista hora in antea, nos in illa Ecclesia, qui supra scriptum est, de Sancto Petro Apostolo ; nec in cimiterio, nec in illas mansiones, quæ per manu Alboyno, nec per Monachos de illo loco factas erunt, vel acaptadas fuerint, nec in marcado homines nec feminas non Aucirent, nec membra illorum nolor tollere ; nec pro redemptione non distringerent sine grado Aboyne, aut Monachos de isto loco nostro sciente.

Conjicit eruditissimus vir Domnus Dion. Sammarthanius in Gloss. ad calcem hujus voluminis edito, pro auctionarentur, Aucirent dictum fuisse ; verum ex sequentibus patet Jus sibi gladii fundatorem reservare, prohibereque ne quivis homo vel femina pro quovis delicto in mercato occidatur, mutileturve etc. Confirmatur ex ejusdem operis Glossario ad calcem tom. 2. in quo hæc leguntur : Aveirent pro occiderent. In pago Fuxensi vulgo dicitur Aucire pro occidere. Ubi scriptum, sed perperam aveire.