« »
 
[]« Audientes » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 468c. http://ducange.enc.sorbonne.fr/AUDIENTES
AUDIENTES, dicti Scriptoribus Latinis Ecclesiasticis, qui Græcis ϰατηχούμενοι, vel quod antequam ad Baptismum admitterentur, fidei Christianæ erudirentur mysteriis : vel, quod priusquam sacra fieret Liturgia,
Scripturas audirent
, ut est in Canone 21. Concilii Nicæni Arabici ἀϰροώμενοι, in Concilio Nicæno can. 11. ὡρισμένος τῆς ἀϰροάσεως χρόνος, cap. 12. Theodulfus Aurelianensis de Baptismo cap. 2 :
Catecuminus, Audiens, sive Instructus interpretatur.
S. Cyprianus Epist. 13 :
Audientibus, etiam si qui fuerint periculo præventi, et in exitu constituti, vigilantia vestra non desit.
Epist. 14 :
Optatum inter Lectores Doctorem Audientium constituimus.
Tertullianus de Pœnitentia :
Audientes optare intinctionem, non præsumere oportet.
Anonymus de Baptismo hæreticor. a Rigaltio editus :
Licet negator ille antea vel hæreticus fuerit vel Audiens, vel audire incipiens, qui nondum baptizatus sit, etc.
Collatio Carthaginensis cum Donatistis cap. 197 :
Ipse est Episcopus, qui rebaptizatus est, et factus est Audiens.
Concilium Wormaciense sub Adriano II. PP. cap. 27 :
Post expletum vero quinquennii tempus, ingrediatur Ecclesiam, sed inter Audientes tantummodo sit, vel, dum facultas conceditur, sedeat.
Ita etiam vocem ϰατηχούμενοι, per Audientes reddunt Isidorus Mercator et Dyonysius Exiguus in Concilio Laodiceno cap. 4. [] 5. 8. Adde cap. 30. Capitul. Caroli Mag. lib. 5. cap. 69. 71. 134. 136. Addit. 3. cap. 69. 104. Concil. Triburiense ann. 895. can. 5. Capitula Theodoric. cap. 37. etc. Vide Auditor 5.
les Bénédictins de St. Maur, 1733–1736.
Audientes, pari ratione dicti sunt Pœnitentes publici secundæ classis, quod audita, quæ ante sacram Liturgiam fieri solebat, oratione, simul cum Catechumenis ejicerentur, utpote qui indigni censerentur sacrorum Mysteriorum præsentia et participatione. Greg. Thaumaturgus in Epist. Canonica cap. 11 :
Auditio est intra portam in porticu, ubi oportet, eum qui peccavit, stare usque ad Catechumenos, et illinc egredi. Audiens enim, inquit, Scripturas et doctrinam ejiciatur, et precatione indignus censeatur.
Vide Pœnitentes, et Glossar. med. Græcit. voc. Ἀϰρόασις et Ἀϰροώμενοι.
Audientes. Capitulare 4. ann. 805. cap. 3 :
De justitiis Ecclesiarum Dei, viduarum, orphanorum, pupillorum, ut in publicis judiciis non dispiciantur Audientes, sed diligenter audiantur.
les Bénédictins de St. Maur, 1733–1736.
Audientes, Auditores, Discipuli, qui Literas, Philosophiam aliasve artes discunt. Spicil. Acher. tom. 6. pag. 144 :
In facultate artium... Doctorum, Magistrorum, Licentiatorum, Bacchalaureorum.... studentium et Audientium dictæ Universitatis Parisiensis, etc.
© École des chartes.