AUTUMNUS, Bajuvarii annos suos per Autumnos numerabant, (ut Anglo-Saxones per Hiemes, in Legib. Canuti Regis cap. 19. et Dani, apud Wormium in Fastis Danicis cap. 7.) Lex Bajuvar. tit. 7. cap. 19. § 4 :

Per singulos annos, id est, Autumnos singulos.

Olim Germani, ut auctor est Tacitus, quid esset Autumnus, non norant. Sic ille lib. de Morib. German. :

Annum quoque ipsum non in totidem digerunt species, hiems et ver et æstas intellectum ac vocabula habent : Autumni perinde nomen ac bona ignorantur.

Quando vero Autumnus apud nos, ut et cæteræ anni tempestates incipiant, docent versus isti apud Lindwodum :

Dat Clemens Hiemem, dat Petrus Ver Cathedratus,

  Æstuat Urbanus, Autumnat Bartholomæus.