AXIVELLARI, adxivellari, exivellari, exavellari, ex Ital. Agevolare, captivitatem alicui mitigare, lenire, ei quasdam insolitas commoditates permittendo. Stat. Bonon. ann. 1250-67. t. iii. pag. 316-17 :

Salvo quod dicti capti ad voluntatem potestatis et consilii possint et debeant Exivellari et ostedegari...

et paulo post :

Et non possint ostedegari vel Adxivellari aut de carcere relaxari per vicem ultra iiij de militibus, et viij de peditibus ; et exire circlam civitatis, dando quilibet miles, qui ostedegabitur duos bonos obsides et alias securitates prestando ad voluntatem potestatis et consilii.

Hæ provisiones ad hostes captos prælio Mutinensi ad Fossam altam spectabant ; sed paulo diversius occurrunt etiam spectantes ad omnes alios, qui in carcere asservabantur, ut patet ex loco, quem refert D. Carpentier sub voce Agevolare. Stat. antiq. Florent. lib. 1. cap. 73 :

Ipsi superstites teneantur .... Agevolare et retinere intra muros dictorum carcerum, in mallevato vel granario, omnes et singulos carceratos.... dummodo hujusmodi Agevolati pro tali Agevolatione solvant nomine gabelle... solidum unum... salvo quod nullus Agevolari possit, qui fuerit retentus... pro debito... absque licentia creditoris.

fr.