« »
 
BARBA 1, BARBA 2, BARBA 3.
[]« 1 barba » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 567b. http://ducange.enc.sorbonne.fr/BARBA1
1. BARBA, Barbam tangere, seu primam lanuginem incidere, de quo more apud paganos et Christianos copiose egimus [] ad Joinvillam Dissert. 22. pag. 273. Collectio historica quam H. Canisius Anonymi nomine publicavit tom. 2. Antiq. lect. lib. 3. cap. 10 :
Ut Alaricus Barbam tangeret Clodovei effectus patrinus, etc.
Roricon. lib. 4. apud Duchesnium tom. 1. pag. 812 :
Ut in tondenda Barba Clodovei patrinus ejus efficeretur Alaricus.
Adde Aimoin. lib. 1. cap. 20. et vide Frisclinum et Henricum Stephanum ad Callimachum Hymno in Dianam versu 298. Turneb. lib. 7. Advers. cap. 14. Lipsium ad 14. Annalium Taciti pag. 454. Commentatores Petronii et Martialis lib. 1. Epigr. 32. lib. 9. Epigr. 17. 18. Adrianum Valesium ad Paneg. Berengar. et Alios Criticorum filios. Confer Grimm. Antiq. Juris pag. 147.
P. Carpentier, 1766.
◊ Monachi in radendo barbam, aqua herbis aromaticis imbuta utebantur. Consuet. monast. S. Crucis Burdegal. MSS. ante ann. 1305 :
Hortum, qui est juxta infirmitorium et refectorium juxta dictum claustrum, debent gubernare monachi parvi seu juveniles, et debent tenere garnitum de romaris, de salvia, de majoracis, de bazalis, de menta et de ruta, ut monachi, tam sani quam infirmi, possint exinde recipere pro ponendo in aqua, quando vult radi.
Honesta Barba, sic appellatus Balduinus IV. Comes Flandriæ in Charta Roberti Regis Franc. ann. 1023. quam subscribit, in Probat. Hist. Monmorenc. pag. 13.
Barba Falsa. Curia Generalis Catalaniæ celebrata ann. 1351. sub Petro III. Rege Aragon. :
Ne quis Barbam falsam, seu fictam audeat deferre vel fabricare.
Constit. lib. 9. tit. 7. const. 2.
Per Barbam aut Capillos Trahere, in Lege Longobard. lib. 1. tit. 6. § 4. Rothar. 386. et lib. 2. Feud. tit. 27. injuriæ majoris species.
Barbæ Benedictio. Ademarus Cabanensis apud Beslium, pag. 328. de Jordano Episcopo Lemovicensi :
Inde ad tumulum S. Martialis Missam audivit, et juxta Monasterium eo die regulariter hospitatus est. Crastino Barbam Benedici jubet et detondi, et sic ad sedem S. Martialis in aula S. Stephani Jordanum duxerunt, et cum baculo pastorali ibi eum gratis honore Pontificatus vestivit.
Editio Labbei paulo differt :
Die crastino Barbam Electo Benedici jubet ac detondi, etc.
quia scilicet
Barbam radere, Sacerdotibus ac Clericis Latinis solemne, contra quam Græcis. Gregorius VII. PP. lib. 8. Epist. 10 :
Scilicet, ut quemadmodum totius Occidentalis Ecclesiæ Clerus ab ipsis fidei Christianæ primordiis Barbam radendi morem tenuit, ita et ipse frater vester Archiepiscopus raderet.
Vide Æneam Parisiensem lib. adversus Græcos quæst. 5. et quæ adnotamus ad Alexiadem pag. 283.
les Bénédictins de St. Maur, 1733–1736.
◊ Ita et apud Monachos solemnis barbæ tonsio, cum habitum scilicet Monachicum induebant, Benedictio Barbæ vocabatur. Vide Bernardum Mon. in Ord. Cluniac. part. 1. cap. 59.
Barbam Deo Consecrabant, qui eam ponebant Monachi effecti. Vide Vitam S. Willelmi Ducis cap. 23. Edit. Mabillonii.
les Bénédictins de St. Maur, 1733–1736.
Barbæ Pilos Chartis cum sigillo apponebant, quo eas sacratiores Frmioresque redderent. Charta ann. 1121. apud Stephanot. tom. 16. Fragm. Hist. pag. 337 :
Quod ut ratum et stabile perseveret in posterum, præsenti scripto sigilli mei robur apposui cum tribus pilis barbæ meæ.
Vide Pillum. []
Barbæ Rasio, præcipua apud Francos injuria habebatur. Vide Gesta Dagoberti Regis Franc. cap. 6. 35. Reginonem ann. 546. etc. Ita apud Græcos Byzantinos. Willelmus Tyrius lib. 11. cap. 11 :
Mos est Orientalibus, tam Græcis quam aliis nationibus, barbam tota cura et omni sollicitudine nutrire, pro summoque probro et majori quæ unquam irrogari possit ignominia, reputare, si vel unus pilus quocunque sibi casu de Barba cum injuria detrahatur.
Vide Paulum Jovium in Elogio Francisci Philelphi, et Gobelinum Personam in Cosmodromio pag. 266.
Barbam Hypothecare. Vide Ibidem Tyrium.
P. Carpentier, 1766.
Barba, pro Gena, vel mentum ubi crescit barba. Acta S. Parid. tom. 2. Aug. pag. 77. col. 1 :
Cum autem ad aures cujusdam mulieris,.... quæ in ore simul et Barba morbum patiebatur, etc.
Hinc Barbouchet, Barbouquet et Barbuquet nostris, dicitur alapa seu actio, qua alicui mentum in contumeliam extollitur et agitatur, ita ut dentes concrepent ; f. a Gall. Barbe et Hocher. Lit remiss. ann. 1398. in Reg. 154. Chartoph. reg. ch. 7 :
Icellui Louvigny haussa le menton audit Regnaud, et lui fist le Barbouchet, en lui disant qu'ilz estoient mauvais garçons.
Aliæ ann. 1406. ex Reg. 161. ch. 68 :
Lui donna un Barbouquet.
Taxat. emendar. in Scacar. Rotomag. ann. 1406. ubi de div. injur. modis :
D'un Barbuquet est deu cinq solz, trois deniers. Parbouquet,
eadem notione, in Lit. remiss. ann. 1359. ex Reg. 90. ch. 330 :
Icellui Pierre feri ledit Robert un petit cop de la main souz le menton, lequel cop est appellé au païs Parbouquet.
Aliæ ann. 1406. in Reg. 160. ch. 398 :
Comme icelle femme eust donné par maniere d'esbatement sur le visaige dudit Rotro une buffe, ditte selon le langaige du païs un Parbouquet.
Eodem sensu, sed alia origine Croisbet et Soubzbriquet usurparunt etiam nostri. Lib. remiss. ann. 1398. in Reg. 154. ch. 62 :
Machery fery le suppliant par le menton et lui fist le Croisbet.
Aliæ ann. 1416. ex Reg. 169. ch. 455 :
Jehan Breteau frappa le suppliant une fois ou deux de la main parmi le visage, en lui faisant le Croisbet moult rudement.
Lit. remiss. ann. 1355. in Reg. 84. ch. 390 :
Idem barbitonsor præfatum exponentem percussit super mentonem, faciendo dictum le Soubriquet.
Aliæ ann. 1398. in Reg. 153. ch. 445 :
Le suppliant donna audit Michiel deux petits coups, appellez Soubzbriquez, des dois de la main soubz le menton.
Alia rursus origine id contumeliæ genus dictum Cireau, Sireau, Sisiau et Sizeau. Lit. remiss. ann. 1399. in Reg. 154. ch. 506 :
Icellui Despaigne.... dist au suppliant.... qu'il lui faisoit Sireau et ne le doubtoit de riens.
Aliæ ann. 1409. in Reg. 163. ch. 379 :
Icellui Hoquemare dist au suppliant, vela pour tout ce que tu en pourras faire, en lui faisant le Sisiau. Ciriau,
in aliis ann. 1406. ex Reg. 160. ch. 13. Aliæ ann. 1401. in Reg. 161. ch. 31 :
Icellui Jehan... fist au suppliant le Cireau ou visage par plusieurs foiz.
Denique aliæ ann. 1415. in Reg. 169. ch. 200 :
Lequel Lenfant vint donner à icellui Henryot soubz le menton de sa main par maniere de Sizeau.
P. Carpentier, 1766.
◊ Barbe foulle, Lanugo, vulgo Poil follet, in Glossar. Gall. Lat. ex Cod. reg. 7684. En barbe, pro Coram, vulgo En face ; quo sensu Barba à barba dicunt Hispani. Lit. remiss. ann. 1475. in Reg. 195. ch. 1350 :
Icellui Estienne dist au suppliant : Tu m'as appellé gaudisseur, [] avant qu'il soit une heure je te verrai en Barbe.
Barba, in falcone, sunt
plumæ inferiores, quæ videntur quasi pili, et sunt inter locum rostri, qui cera dicitur, et oculos
, apud Fridericum II. Imp. lib. 2. de Venat. cap. 48.
© École des chartes.
[]« 2 barba » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 568b. http://ducange.enc.sorbonne.fr/BARBA2
2. BARBA, Patruus. Vide Barbanus.
© École des chartes.
[]« 3 barba » (par P. Carpentier, 1766), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 1, col. 568b. http://ducange.enc.sorbonne.fr/BARBA3
3. BARBA. Caballus de Barba, nostris Cheval barbe, Equus Punicus. Charta ann. 1076. ex Tabul. Aquens. :
Suscepimus de ipsa terra sexaginta solidatas in caballo de Barba.
Vide infra Barbanus 3.
© École des chartes.