BEREFELLARII. Charta Thomæ Archiepiscopi Eboracensis, in Monastico Anglic. tom. 3. part. 2. pag. 5 :

Scilicet Præcentoris, Cancellarii, et Sacristæ, ac 7. Personarum, qui olim Berefellarii fuerant nuncupati, etc.

Infra :

Præsentatio autem sive collatio prædictorum ministrorum, videlicet Præcentoris, Cancellarii et Sacristæ, ac etiam Personarum dudum vocatarum Berefellarii : quos quidem Berefellarios recolendæ memoriæ D. Joan. de Thoresby, dudum Eborum Archiepiscopus (obiit ille ann. 1373.) ad honorem dictæ Ecclesiæ Beverlaci, et majorem decentiam ministrantium in eadem provincia ordinabat, Personis in Ecclesia nostra Cathedrali et Metropolitica Eborum officiando Ecclesiæ in divinis in habitu conformari. Sed quia eorum turpe nomen Berefellariorum patens risui remanebat, dictos 7. de cætero non Berefellarios, sed Personas volumus nuncupari.

Dicti autem isti Berefellarii ; quasi concagati, seu Breneux ; ex Anglicano Berayed, conforiatus, permerdatus. Cur autem ita obscœna hujusmodi iis indita appellatio, dicant Angli ipsi. Compositum videtur ex Bera, Ursus et Fell, Pellis ; fortasse ab habitu, quem Archiepiscopus immutavisse dicitur, ita vocitati.