BOQUETALLUM. Exstat Charta Gaufridi de Liziniano D. de Vouvent et de Mervent, data Spoleti ann. 1232. qua Abbati Malleacensi dimittit Expeditionem et exercitum, Bannum, Boquetallum, quæ quidem ab hominibus Abbatis sibi deberi contendebat. In Charta Hugonis militis anni. 1263 :

Dominus Partiniaci, Volventi et Marcventi petit plures angarias, pangarias et costumas ab hominibus virorum Religiosorum Abbatis et Conventus de Burgolio... biennum ad reficiendum fossata castri novi de Marcvento, et Boquespan et plesses ad animalia silvestria capienda, etc.

Cum in utraque laudata Charta de iisdem fere petitionibus, a diversis licet monasteriis, agatur, nullus dubito, quin idem sit vocum Boquetalli et Boquespan intellectus ; sed quis ille ? An Jus procurationis, seu modici pastus, quem etiamnum Boquelle vocant rustici Dumbenses ? Certe Boquelle a Boquetallum posset proficisci. Eumdem sensum patitur Bosquetallum in Charta anni 1232. apud Stephanotium in Antiquit. Benedict. Pictav. MSS. tom. 4. pag. 408 :

Expeditionem quoque, biannum, Bosquetallum, in quibus teneri mihi eosdem homines proponebant.