BORGHA, et Burgha, Anglis dicitur ea Comitatus sive provinciæ portio, quam olim Decaniam, Decennam, Decuriam, Decimam, et Friburgam, vocabant, inhabitata a Decemviris, qui in solidum fidejussores erant erga Regem de iis quæ in decenna perpetrarentur. Quippe Alvredus Rex, qui vixit ann. 880. Angliam totam in Comitatus, Comitatus in Centurias, atque has in Decennas seu Decurias divisit. Decuria, ut infra docemus, constabat decem familiis, seu viris, quorum singuli fidejussores erant erga Regem de se bene gerendo, ita scilicet ut delinquentem quemlibet ceteri novem in judicio sisterent, fugientemque intra 31. dies redderent, vel ipsimet lege tenerentur. Atque vox, Borgha, occurrit non semel hac notione apud W. Thorn. pag. 2021. 2053. Burgha vero pag. 2033.