BOTILLAGIUM, Præstationis species. quam Bouteillage vocant, idem quod Botellagium. Charta Conani ducis Brit. :

Notum sit.... me reddidisse et concessisse Lamberto Contedoer filio, homini meo, Botillagium suum, in quacumque domo manserit, quietum.

Eadem Charta ex Bibl. S. Germ. Prat. habet Botoillagium. Haud absimilis est præstatio, quam ecclesiæ S. Petri sponte exhibituros se deinceps promittunt cives Redonenses ex vet. Notit. tom. 1. Probat. Hist. Brit. col. 357 :

Cives prædictæ urbis.... constituerunt...... de vino et medo, quæ venundantur in urbe Redonis aut in suburbio ejus, cujuscumque esset, seu comitis seu monachorum seu monacharum, de tonna quatuor modiorum vel quinque, lagenam unam dare ecclesiæ S. Petri Redonensis ad victum canonicorum.