3. BREVIA Mortuorum, quæ a Monachis in ea Monasteria, cum quibus societatem, seu ut aiunt, fraternitatem inierant, mittebantur, quibus Monachorum suorum mortem et obitum nunciabant, quo pro iis statas et ordinarias preces et Missas exsolverent. Litteræ currentes dicuntur in Conc. apud Saponarias ann. 859. cap. 13. quarum formula ita concipitur in libro Usuum Ordinis Cisterciensis cap. 98. extremo :

Prima Augusti obiit in Monasterio N. Nonnus N. de N. Sacerdos et Sacrista ejusdem Monasterii : pro cujus anima vestras precamur orationes ex charitate, et orabimus pro vestris.

Alias formulas collegit Haëftenus lib. 8. Disquis. Monast. tr. 1. Disq. 4. § 3. Liber Ord. S. Victor. Paris. MS. cap. 14 :

Ad ejus (Eleemosynarii) officium pertinet Breves de defunctis foris ad deferendum dare, et allatos suscipere, et in loco constituto ponere.

Hugo Abbas Cluniac. in Statutis Cluniac. cap. de Brevibus mortuorum :

Statuimus, ut... ubicunque Frater decesserit, major deferendis Brevibus habeatur diligentia, et omnimode defunctis debita persolvantur.

Antiquæ Consuet. Canon. Regul. de Monteforti in diœc. Maclov. apud Marten. tom. 4. Anecd. col. 1217 :

Quod si quod Breve pro defuncto ipso die legendum fuerit, statim subjungatur : quibus pronunciatis, si præbenda pro eis fuerit, dicat lector, habet præbendam, vel habet præbendas, quot scilicet annotatas viderit. Deinde dicat, qui tenet capitulum, anima ejus, vel animæ eorum, si plures fuerint, et animæ omnium fidelium defunctorum requiescant in pace ; et responso ab omnibus, Amen, lector, etc

. Vide Cæsarium Heisterbach. lib. 1. Mirac. cap. 40. et librum Epistolarum S. Bonifacii Archiepiscopi Moguntini Epist. 108. et alibi passim. Statuta Ordinis de Sempringham pag. 780. 781. Vitam S. Hildegundis num. 34. Histor. Monast. S. Barbaræ Lugdun. cap. 19. num. 4. 6. cap. 20. n. 4. cap. 25. n. 3. etc. Vide Breviatus suo loco.