BURDA, Amictus junceus : vox Africana. S. Augustinus Epist. 68 :

Presbyterum etiam quendam... Burda vestitum, etc.

Epist. 166 :

Raptus est de domo sua, cæsus in aqua volutatus, Burda vestitus, et nescio quot dies in captivitate retentus est.

Idem lib. 3. contra Crescon. cap. 48. de eodem Presbytero, cujus mentio est in iis Epistolis :

Ad furentium arbitrium fustibus cæsus, in lacuna lutulenta volutatus, amictu junceo dehonestatus.

Ex quibus jure addubitari potest, an hæc vox ab Arabico Bord, Borda, etymon habeat, quæ definitur a Giggeio,

vestis variis lineis contexta, et variegata : nigra vestis flavo colore intexta, quam induunt Arabes.

Nam Burdæ Augustinianæ, juncis, non lana, intertextæ fuerunt. Sed et scribit Salmasius lib. de Modo usur. pag. 401. Burdi, apud Arabes, papyrum sive juncum Ægyptium significare. Acta SS. Junii tom. 3. pag. 441. de S. Raynerio :

Burdas, operimenta scilicet capitum auferebat.