CABANNARIA, Glossarium mediae et infimae latinitatis, Du Cange et al.

« Cabannaria » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 2, col. 006c. http://ducange.enc.sorbonne.fr/CABANNARIA

CABANNARIA, Ædes rustica, Capanna, vel Cabanna, vel prædium rusticum. Vetus precaria apud V. Cl. Dion. Salvaingum :

Deprecatus est Monachos unam Cabannariam.

Hoc est, in precariam sibi dari postulavit Tabularium Prioratus de Domina in Delphinatu fol. 17. 18 :

Dedit pro anima sua unam Cabannariam super castrum Auriacense, quam tenet Petrus Cabannellus. Dedit etiam totum alodum suum, quem habebat in Savoia, præter unam Cabannariam, etc.

Infra :

Videlicet Cabannariam unam, sitam in loco, qui dicitur, etc.

Rursum :

Ministraliam autem hujus Cabannariæ dedit quidam villicus, etc.

Occurrit ibi non semel. Guerpitio decimæ tom. 1. Hist. Dalphin. pag. 130 :

Petrus Gorga et ejus uxor..... guerpiverunt Deo et B. Mariæ et S. Vincentio et Episcopo Hugoni... decimam, quam ipsi habebant in Cabannaria, quam tenent de Aimone vetulo.

Videtur deducta vox a Cannabi ; ut fuerit ager in quo cannabis seritur ; indeque prædiis ac ædibus rusticis nomen manserit. Tabular. S. Mauri ad Ligerim :

Pour eux amaiser, pour maisonner, pour faire curtils et Chenevieres, et autres cultivemens.

Vide Cavannaria.

Chabanaria. Charta Hugonis Episcopi Gratianopolitani ann. 1094. in Tabulario ejusdem ecclesiæ fol. 19 :

Vendidit mihi unam Chabanariam, quæ est Misereu, pro 170. solidis, etc.

Fol. 24 :

Et accepimus de omnibus vineis decimam, quæ sunt subtus viam in omnibus locis, excepto de condaminis Episcopi, vel de Chabanaria, quæ fuit Petri Aldiard, scilicet de terris ac vineis, in quibus nec in condaminis, nec in Chabanaria prædicta non accipimus, etc.

Fol. 25 :

Decima vero de aquis, de pullis, de aliis omnibus carnibus, de chanavis, de omnibus annonis, sive de omnibus rebus, quæ decimari debentur, medietas est Episcopi, medietas est Canonicorum, scilicet de ecclesia S. Imerii, de ecclesia de Buieu, de ecclesia S. Martini, sive de parochiis illarum prædictarum Ecclesiarum, excepto de condaminis Episcopi, sive Chabanaria, quæ fuit Petri Aldiard, scilicet de terris ac vineis, etc.

Fol. 31 :

Excepto de condaminis, quas tunc habebam, et de vinea, quæ fuit de Chabanaria Petri Adliard.

Fol. 41 :

Nantelmus de Jerra habuit 3. Chabanarias pro Episcopo Hugone Gratianopolitano, qui reddit unaquaque 13. sextarios de civata, et 12. denarios et 1. gallinam, et 1. pulzinum, et opera, et manu-opera.

Fol. 49 :

Ante me confessus est ipsam Chabanariam esse antiquum feudum Cellariæ, etc.

Fol. 53 :

Et omnes Chabanariæ prædictæ debent opera et manuum operam, et coroatam, sicut alia terra Episcopi vel Comitis.

Fol. 60 :

Medietatem decimæ milii et panitii, sive leguminis et chanavi, gurpisco et dono, etc.

Fol. 75 :

Excepto Chabanariam, in qua est domus mea, quam pater meus dedit B. Laurento, decimam de prædicta Chabanaria.

Fol. 76 :

Excepto unam Chabanariam, sive tenuram, quæ est S. Laurentii Monasterii.

Tabularium Eleemosynæ S. Pauli Viennensis :

Dono sanctæ Viennensi Eleemosynæ de alodo meo unum campum rotundum, et duas sextariatas terræ juxta eundem campum, et duas cavenarias, et alterum campum, etc.

Alibi :

Unam Chanavariam vendimus et donamus, quæ est sita in villa, qua vocatur Plans.

les Bénédictins de St. Maur, 1733–1736.

Chanvannarius Mansus. Inquisitio de juribus Dalphinalibus tom. 1. Hist. Dalphin. pag. 123 :

Item capiebat sescalcus taschias in Vauz in pluribus Mansis Chanvannariis et bordariis, de quibus tangitur in libro ; de aliis vero censibus et juribus quæ capiebat selscalcus in Mansis Chanvannariis et bordariis prædictis, tractatur in libro Domini.