CAMBORTA, Frutex incurvatus, repandus, Cambrec, Germanis, unde Kammerladen, per quem vites curvantur et repanduntur. Ita Goldastus. Certe Cambus in veteri Glossario, ϰαμπτός redditur. Kant-boort, Flandris, est extremæ oræ margo. Glossarium laudatum a viris doctis : Cambortæ, quæ sepem desuper firmant. Hoc est, tres illæ virgæ plexiles, reliquis ramalibus crassiores, quæ superne sepem connexant. Lex Salica tit. 36 :

Si quis tres virgas, cum quibus sepes superligata est, vel retortas, quibus sepes continetur, capulaverit, vel Cambortas excervicaverit, etc.

Lex Ripuar. tit. 43 :

Si quis tres virgas, unde sepis ligatur, vel retortas, unde sepis continetur, capulaverit, aut tres Cambortas involaverit, etc.

Editio Heroldi :

Aut in Cambortas involaverit.

Eccardus Cambortas explicat per baculos incurvos oblique terræ infixos, ut sepem contineant, ne in latus inclinare possit, aut corruere.