CAPITE-Census, apud Papiam MS. :

Taxatio possessionum, vel qui caput suum deducit ad censum, ad honorem, ad divitias. Capitecensus, corona quæ capite geritur.

Isidoro in Glossis : Capite census, coronam qui in capite gerit. Capite Census, taxatio possessionis. Ad hæc Grævius : Sed cur Capite census dicitur qui coronam in capite gerit ? Puto, inquit, quia qui sub corona vendebantur, in capite coronam gerebant, illorumque caput censebatur, hoc est æstimabatur illo pretio, quod ei a venditore statuebatur. Charta Henrici Imp. ann. 1039. in Metropoli Salisburgensi tom. 1. pag. 147 :

Cum... censibus et Capiticensibus, agris, campis, vineis, etc.

Occurrit ibid. in aliis Chartis. Charta Communiæ Faræ ann. 1207. apud Thomasserium pag. 438 :

Statuimus etiam ut homines Capitecensi dominis suis censum capitis sui infra terminos Pacis tantum persolvant, etc.

Notum est Capite censos, a Romanis dictos fuisse, qui nullo vel minimo ære censebantur, quasi qui censerentur suo solo capite. Vide rursum Capite censi post Caput 3.