CARITEL, Karitellus, Vox de Caritelo apud Lusitanos inclamabatur prædatores persequendo sive eos qui violenter aliquem injuriaverant. Vide S. Rosa de Viterbo, qui verbi originem a Quiritare deducit. Porro Caritel significat querelam, Calumniam, qua inde in foro agebatur et de ea dijudicandi jus atque potestatem. Charta Alphonsi II. reg. Portug. ann. 1218 :

Non pectem Caritel de naso et si fecerint calumpniam in alia parte, etc.

Alia anni 1154 :

Hæc dono et concedo vobis.... cum suo Caritel, vel cum suo Sagione et cum omnibus suis directuris et calumnis et cum omni voce regia.

Alia ann. 1187 :

Sagion et majordomus non ponant Caritel, nisi cum auctore et testibus, etc.

Alia ann. 1132 :

Omnem rem illam, quæ ad regem pertinet, callumnia, Karritellum, fossadariam, regalengum dimitto, etc.

Alia ann. 1174 :

Ab omni jure regio absolvo, cabdali, calumpnia, voce Cariteli.

Interdum nude vox scribitur.