CATARACTÆ, Glossarium mediae et infimae latinitatis, Du Cange et al.

« Cataractæ » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 2, col. 221c. http://ducange.enc.sorbonne.fr/CATARACTAE

CATARACTÆ, Clathra, aut fores clathratæ, ad cataractæ formam ex lignis seu ferro cancellatim compactæ, vel portæ robustiores, funibus aut catenis ita suspensæ, ut demitti et subduci possint, prout res postulat, quales in urbium aut arcium aditu, hostium irruptioni propulsandæ passim in usu remanserunt. Vide Forcellinum. Cod. reg. 7644 : Cataractæ, Fenestræ vel foramina. Papias in cod. reg. 7609 : Cœli fenestræ vel tonitrua, ex Psalmista. Caterattas, Boccacius vocat quasvis fenestras clathratas. Anastasius Bibl. in Gregor. IV. pag. 167 :

Civitatem aliam a solo valde fortissimam, muris quoque altioribus, portis simul ac seris, et Cataractis eam undique permunivit.

Versus antiqui de Mediolano apud Murator. tom. 2. part. 2. col. 688 :

Erga murum pretiosas novem habet januas, vinclis ferreis et claves circumspectas naviter, ante quas Cataractarum sistunt propugnacula.

Cataractæ S. Petri. Epistola encyclica Vigilii PP. ad Ecclesiam universam :

Posito indiculo super altare et Cataracta B. Petri, et super Crucem, quæ de ligno passionis Domini habet inclausum, etc.

Epistola Legatorum Sedis Apostolicæ ad Justinum Imperat. tom. 2. Epist. Roman. Pontif. de Justiniano nondum Imperatore, qui reliquias SS. Apostolorum et S. Laurentii ab Hormisda PP. poposcerat :

Sanctuaria beatorum Apostolorum, secundum morem ei largiri præcipite, et si fieri potest, ad secundam Cataractam ipsa sanctuaria deponere, vestrum est deliberare.

Ubi Cataracta S. Petri, non est Catena S. Petri, de qua mox dicemus, sed Cancellus ferreus in modum cataractæ compactus, quo muniebatur sepulcrum seu confessio S. Petri. Duplex autem erat ea cataracta, prima quæ exterius, secunda quæ interius sepulcrum ambibat.

Cataracta, Carcer, ita dictus, quod clathris, seu foribus clathratis ut plurimum carcerum aditus occludantur. Ita ϰαταράϰτης vox intelligitur apud 70. Interpretes Hieremiæ 20. v. 2.

Cataractarius, Commentariensis, Carcerarius. Passio SS. Perpetuæ et Felicitatis :

Ait illi quidam ex ministris Cataractariorum.

Acta SS. Montani et sociorum num. 171 :

Obnitentibus etiam Cataractariorum ministris.

Ubi alii Codd. habent Carcerariorum. Eadem Acta n. 9 :

Qui disrupto Cataractarum obice, etc.

Perperam Cataractariorum, quod evincit Codex alius, qui catenarum præfert.