1. CATASTA, Instrumentum torquendi, cujus non una mentio in Actis Martyrum, diversum ab equuleo. Gloss. Isid. : Catasta, eculeum, genus pœnæ. Catasta, lectus ferreus. Iso Magister in Glossis : Catastæ, genus tormenti, id est, lecti ferrei ; quibus impositi Martyres, ignis supponebatur. Gloss. in cod. reg. 7644 : Castata, Eculeum, scala eculeo similis. Gloss. ap. Maium tom. 7. pag. 554. et Papias in cod. reg. 7609 : Scala, vel genus pœnæ equuleo similis. Vide Forcellinum. S. Cyprianus Epist. 33 :

Ad pulpitum post Catastam venire.

S. Augustinus in Psalm. 96 :

Habebant gaudia in Catasta, qui Christum prædicabant inter tormenta.

Aponius lib. 3. Comment. in Cantica Cantic. :

Catastæ quippe et diversarum pœnarum tormenta impiis et stultis ignominiosa et detestabilia videbantur.

Acta SS. Perpetuæ et Felicitatis :

Ascendimus in Catasta... et extraxit me de gradu.

Acta SS. Martyrum Numidarum n. 6 :

Illic erat Catasta non humili pulpito, nec uno tantum ascendibilis gradu, sed multis ordinata gradibus, et longe sublimis ascensus, etc.

Salvianus lib. 3. de Gubernat. Dei, de Martyribus :

Qui ad Cœlestis regiæ januam gradibus pœnarum suarum ascendentes, scalas sibi quodammodo de eculeis Catastisque fecerunt.

Adde Acta S. Dorotheæ n. 5. et quæ observant Baronius ad 16. Martii, et Anton. Caracciolus in Sacris Ecclesiæ Neapol. monumentis pag. 181. ut et Casaubonus ad Persii Sat. 6. ubi multa de hac voce, necnon Gallonius de Cruciatibus Martyrum cap. 2. et Muratorius Antiq. Ital. tom. 2. col. 1181.

2. CATASTA, Vox Italica, Strues, lignorum congeries. Tractat. MS. de Re milit. et mach. bellic. cap. 6 :

Faciat lignaria incidere, de quibus fiant in diversis locis foci in die suæ discessionis, et accensis Catastis lignorum statim discedat cum suo exercitu.

CATHASTA. Vide Catasta.