CENTONIZARE,

More centonario

, ex variis libris describere, excerpere. Rupertus Tuitiensis lib. 2. de Divin. offic. cap. 21. Chron. Reichersperg. ann. 591. et Radulphus de Diceto in Abbrev. Hist. :

Gregorius... Antiphonarium regulariter Centonizavit.

Sigebertus de Scriptorib. Eccles. in Beda :

Centonizavit etiam expositionem in Cantica Canticorum, collectis sententiis de libris Gregorii PP. per diversa opera illius.

Chron. Abbatiæ Gemblac. de Burchardo Wormac. Episcopo :

Olberto dictante et magistrante, magnum illud Canonum volumen Centonizavit, et quasi collectis floribus omniformis generis de prato scripturarum coronam pretiosiorem auro et topasio, in edito Ecclesiæ collocavit.

Tertullianus de Præscript. cap. 39 :

Homerocentonas etiam vocare solent, qui de carminibus Homeri propria opera, more Centonario ex multis hinc inde compositis in unum sarciunt corpus.

Papias in MS. Bituric. hæc tria simul congerit tanquam synonyma. : Centonizo, avi, Centuplico, avi, Centurio, avi.