CINTRACUM, Glossarium mediae et infimae latinitatis, Du Cange et al.

« Cintracum » (par les Bénédictins de St. Maur, 1733–1736), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 2, col. 333c. http://ducange.enc.sorbonne.fr/CINTRACUM

CINTRACUM, vel Cintracus, Publici tintinnabuli, si bene conjecto, pulsus citatior, Gall. Tocsin, Ital. Sturmo, f. ab antiquata voce Sing, Signum, Campana, et ab alia etiamnum a nostris usurpata Trac, Crepitus, stridor. Ottoboni Scribæ Annal. Genuenses lib. 3. ad ann. 1196 :

Dominus Drudus populum per campanam et Cintracum convocavit ad parlamentum.

Bartholomæi Scribæ Annal. ejusdem urbis ad ann. 1227 :

Præcepit quod parati essent sequi ipsum cum armis ad sonum campanæ vel Cintraci, et ad quemlibet alium rumorem.

Iidem Annal. ad ann. 1227 :

Dominus Lazarius per campanam et Cintracum more solito omnes fecit ad parlamentum in Ecclesia S. Laurentii convocare.

Sed alia notione mihique obscuriori sumi videtur apud Ogerium Panem in suis Ann. Genuens. lib. 4. ad ann. 1217. ubi sic habetur :

In civitatem nostram venerunt Pisani nobiles viri Scorzaluppus et Aldebrandus Succicus ad recipiendum juramentum hominum mille et Cintracum in anima populi.

P. Carpentier, 1766.

Et Cintragus, Præco apud Genuenses. Charta ann. 1190. apud Murator. tom. 2. Antiq. Ital. med. ævl col. 921 :

Omne lignum, quod venit de Sardinea cum sale, debet dare Cintrago minas salis tres... Cintracus debet ordinare guardias civitatis, et requirere et cognoscere, si facta fuerint. Cintracus debet vocare populum ad parlamentum... Et debet vocare homines ad placitum... Et debet facere bandum per civitatem et per totum archiepiscopatum in præcepto consulum. Et quando ventus Aquilo regnat, debet ire per civitatem, et per castrum, et per burgum, amonendo ut bene caveant ignem. Cintracus debet custodire in Sabbato sancto portam S. Johannis, etc.

Ex his patet quantum a vero abhorret supra proposita explicatio et vocis origo inde deducta.

◊ Et insuper Cintragus in anima populi hoc idem in publico parlamento juravit Actum Janue in capitulo, anno... 1198. (Carta de Grassa, mus. arch. dep. p. 95. »)