Cochlear, inter vasa Ecclesiastica reponitur apud Flodoardum lib. 2. Hist. Rem. cap. 5 :

Cochlearia quoque 12. et salarium argenteum.

Tabular. Monasterii S. Theofredi in Velaunis :

Vinearia stagnea, id est ampullæ, vinum et aquam continentia, vasa quoque lignea, tornatili opere facta, quibus oblatæ servantur, cum Cochleari argenteo quo in patena ponuntur.

Necrologium Eccl. Parisiensis prid. Id. Nov. :

Obiit B. M. Dom. Ranulphus quondam Parisiensis Episcopus, qui dedit Ecclesiæ nostræ et nobis unum Calicem aureum, cum patena et Cochleari ponderis 3. marcarum, et 5. sterlingorum.

Agnelli liber Pontif. apud Murator. tom. 2. pag. 174. col. 2 :

Abstulit Reliquias quas non potuerunt sic citius occultare, ex auro balantias novem, vascula aurea plurima, et Coclearia argentea tractoria, quaternaria una, et diversas alias aureas et argenteas species.

Adde Ingulfum pag. 907. et Ughellum tom. 7. pag. 1274. Browerum lib. 8. Annal. Trevir. num. 114. etc. Græci

Corpus Domini et sanguinem sumunt de Calice, cum Cochleari ad hoc deputato

, inquit Reinerus in Catalogo hæreticor. Λαϐίδα vocant, ut pluribus habet Goarus ad Euchologium pag. 152. ubi et formam exhibet : Georgius Decapolita de Miracul. S. Georgii Mart. num. 47 :

Καὶ πάλιν εἰδε ὁ Σαραϰηνὸς ἐϰ τρίτου τὸν ἱερέα μεταδιδόναι ἐϰ τοῦ σώματός τε ϰαὶ αἷματος τοῦ παιδίου μετὰ τἠς λαϐίδος τοῖς μεταλαμϐάνουσιν.