CONFIRMARE Populum dicitur Archidiaconus, Diaconus, aut Subdiaconus, dum post porrectam a Sacerdote Eucharistiam eidem Dominicum sanguinem hauriendum præbet. Ordo Romanus :

Archidiaconus... tradit calicem Subdiacono regionario qui tradit ei pugillarem, cum quo Confirmet populum.

Infra :

Descendit Pontifex a sede, tenentibus ei manus qui eum duxerunt, ut communicet eos qui in Senatorio sunt, post quem Archidiaconus Confirmat. Postea Episcopi communicant populum, innuente Pontifice, et post eos diaconi Confirmant, Presbyteri autem jussu Pontificis communicant populum, et ipsi vicissim Confirmant.

Occurrit ibi non semel vox Confirmare hac notione. Ita in Expositione Missæ, de Pontifice sacra faciente, Confirmari de calice dicitur, tenente eum Archidiacono. Adde Eclogas Amalarii sub finem. Vide Rabanum lib. 1. de Instit. Cleric. cap. 29.