CONSOLAMENTUM, Ita manus impositionem et Baptismum appellabant Cathari hæretici, ut auctor est Reinerus contra Valdenses cap. 6. pag. 60. et 71. et in sua Summa, quam publici juris fecit Martenius noster tom. 5. Anecd. col. 1761. Ermengardus vero contra eosdem, cap. 14. ritum conferendi Consolamenti pluribus refert. Durandus lib. 6. Ration. cap. 24 :

Arnoldistæ perfidi hæretici dicentes manuum impositionem sive Consolamentum fieri posse a quolibet homine bono.

Petrus Abaelardus adversus Hæreses cap. 15 :

Omnium Hæreticorum est fides, quod nullus post suum Consolamentum receptum, si carnem, vel caseum, vel ova comederit, potest salvari.

Vide Librum Sentent. Inquisit. Tolos. pag. 5. 6. et 14.