CORONARI dicitur civitas, cum festa gaudia concelebrat. Luithprandus lib. 3. cap. 7 :

Tota mox civitas Coronatur, et Romanus Pater Basileos appellatur.

Otto de S. Blasio cap. 39 :

Tota Coronatur civitas, tapetibus sertisque diversi generis et pretii compita illustrantibus, thure, myrrha, aliisque speciebus odoriferis, intus et extra civitatem redolentibus plateis.

Et cap. 51 :

Ottonemque Regem regali ambitione Coronata civitate cum maximo triumpho susceperunt.

Theophanes in Constantino Magno de Constantinopolitanis :

Τὴν πόλιν στεφανώσαντες εἰσεδέξαντο μετὰ χαρᾶς τὸν νιϰητὴν Κωνσταντῖνον, etc.

Theophylactus Simocatta lib. 1. cap. 10. de Nuptiarum Mauricii solemnitate :

Ἡ δὲ πόλις ἐπανηγύρισεν ἐν ἡμέραις ἑπτὰ, ἀργυρέοις τε ἐστεφάνωτο σϰεύεσι, etc.

Ex Tertulliano in Apol. cap. 35. ad Uxor. lib. 2. cap. 6. et de Idol. cap. 15. docemur in hisce occasionibus ædium postes corollis exornari solitos. Vide Glossar. med. Græcit. in Στεφανοῦν.