2. CORPORATIO, Vox Leguleiorum Anglicorum, qua denotant rem permanentem quæ potest habere successionem. Est vero Corporatio composita ex diversis partibus, et in unum corpus coacta, quarum aliæ caput sunt, aliæ membra, totum vero simul junctum Corporationem faciunt. Multiplex autem est Corporatio : alia enim spiritualis, quæ constat ex personis religiosis et manumortuis in Lege, ut sunt Abbas et Conventus : alia spiritualis et personarum quæ in Lege sunt, ut sunt Decani, et Capitula, et Magistri Collegiorum, vel Hospitalium : alia est præterea Corporatio temporalis ex Legis auctoritate, ut sunt Majores et Communitates : denique est Corporatio temporalis ex usu recepto et communi Lege, uti sunt Parlamentales Conventus. Ita Rastallus.