CORSETUS, Tunica, thorax, Gall. Corset. Computum anni 1324. in Hist. Dalphin. tom. 1. pag. 133. col. 1 :

Item pro duobus Corsetis Domini Dalphini et Humberti de Vilars et pro duobus paribus caligarum, videlicet pro septem ulnis de virido, computata qualibet ulna xxxii. sol. valent. xi. lib. 10. sol.

Vita S. Philippi Archiep. Biturig. apud Marten. tom. 3. Anecdot. col. 1931 :

Et quadam die dum obviaret pauperi trementi frigore... Corsetum foderatum quo erat sub cappa indutus exuit et pauperi tradi fecit.

Ordinatio Humberti II. Hist. Dalphin. tom. 2. pag. 315. col. 2 :

Item, quod in festo Paschæ Corseti prædictarum Dominæ Dalphinæ et aliarum Dominarum ac Domicellarum sint longæ cum caudis.

Corseti muliebres rursus memorantur ejusd. tomi pag. 275. 334. col. 1. et 406. col. 2. Corseti ferri recensentur inter Garnisiones seu munitiones inventas in castro civitatis Carcass. ann. 1294. Vide Cursetus.