COSTELLUS, Instrumentum supplicii, idem, ut videtur, quod Collaria, Gall. Carcan ; sed unde dictum ? Pactum anni 1300. in Hist. Dalphin. tom. 2. pag. 54 :

Costellus etiam qui similiter pertinere olim ad dictos Consules dicebatur, si ipsius D. Episcopi, et ad ipsum solum pertineat et pertinere debeat in futurum, hoc salvo quod ubi propter bannum fractum aliquis non habens unde solvat, ponendus, ut moris est, fuerit in ipso, ponatur in ipso communiter nomine Dominorum Episcopi et Comitis prædictorum, et quantum ad casum istum duntaxat Costellus ipse dictis Dominis Episcopo et Comiti sit communis.

Libertates Regni Majoricarum MSS. :

Flecaria, si vendiderit panem de minus penso, vel ponatur in Costello, vel donet quinque solidos.

Charta pro Communia de Balneolo ann. 1300 :

Quisque macellarius teneatur sagnare animalia sua in die mercati sub Costello et recipere sanguinem, vel tempore pluvioso si sagnare voluerint in macello, teneantur recipere sanguinem in aliquo vasculo.

Statuta Massil. lib. 5. cap. 19. § 4 :

Si hoc bannum solvere non poterit fustigetur per civitatem vel ponatur en lo Costell.

Eadem repetuntur ibi § 7. Statuta Avenionensia :

Si autem aliquis pœnam et bannum solvere et restitutionem damnum passo facere nequiverit, ponatur in Costello a pudibundis superius nudus vel nuda, et istud bannum duret post vindemias in omnibus prædiis usque ad festum omnium Sanctorum.

Privilegia Johanni de Masalgis ann. 1348. 24. Aprilis concessa, ex Archivo Præsidis de Mazaugues :

Possit habere carcerem .... Costellum .... adcathenare... et citra sanguinem fustigare,

Vide Crustellum.