1. CREDULITAS, Professio fidei Christianæ, vel potius fides ipsa : Gall. Croyance. S. Cyprianus Epist. 78 :

Dum non desinis tractatibus tuis sacramenta occulta nudare, sic nos in fide facis crescere, et de sæculo homines ad Credulitatem accedere.

Sedulius lib. 1. Paschalis operis cap. 22 :

Hæc est vera fides et firma Credulitas.

Ratherius Veron. in Synodica ad Presbyteros :

Fides autem, id est, Credulitas Dei, etc.

Adde eumdem in Itinerario pag. 271. Anastasius in S. Urbano PP. :

Hic sua traditione multos convertit ad baptismum et Credulitatem.

Idem in sancto Victore :

Christiana confessione Credulitatis clarificata.

Vita MS. S. Arnulphi Archiep. Turon. :

Discedens enim confundebatur iniquitas, et gaudens augebatur in Christo Credulitas.

Occurrit in Concilio Eliberitano can. 42. 44. apud Salvianum lib. 3. de Gubern. Dei, Nicolaum I. PP. in Resp. ad Bulgaros cap. 1. Gennadium de Script. Eccl. in Pastore Episcopo, Petrum Chrysologum serm. 159. Valerianum Cemeleniensem Epist. ad Monachos, Gregor. Turon. lib. 5. Hist. cap. 45. lib. 9. cap. 15. Theodulphum de Ordine Baptismi cap. 7. et 8. Odon. Cluniac. in Credulitate, Othlonum lib. 2. Vitæ S. Bonifacii Mog. cap. 10. in Capitulari Gregorii Magni PP. apud Canisium tom. 1. Antiq. lect. in Constit. Sicul. lib. 1. tit. 1. apud Aimoinum lib. 1. Hist. Fr. cap. 16. lib. 3. cap. 41. Saxonem Grammat. lib. 14. Alanum lib. 6. Anticlaud. cap. 1. Stephanum Eddium in S. Wilfrido cap. 17. etc.